¡Por fin! La oficialidá…

Por fin tres 40 años lluchando pola oficialidá, les instituciones paecen ceder énte esta xusta y necesaria reivindicación de la sociedá asturiana. Sicasí, pal Bloque Críticu, el fechu de qu’esta midida venga de les manos de la socialdemocracia (esto ye, Podemos y PSOE) xenéranos cierta desconfianza. La oficialidá nun ye un fin en sí mesmu, ye un mediu p’algamar un oxetivu, y esti oxetivu cambia según la ideoloxía de cada suxetu, de cada movimientu, de cada partíu. Pa la socialdemocracia, la oficialidá nun ye más qu’una canal de corporativización y encuadramientu de mases nel Estáu burgués; dichu con otres palabres, la oficialidá sírvelos pa caltenenos allegres y contentos, pa que nos sintamos fielmente representaos poles instituciones, pa nada más. Este ye’l so fin, facer del Estáu burgués un Estáu diverso y plural. Pa nós, l’oxetivu ye otru, bien distintu: la oficialidá puede ser xuna bocanada d’aire pa les llingües asturiano y gallego-asturiano, pero de nenguna manera va llegar a bon puertu si nun va acompañada de la llucha organizada y consciente contra’l mesmu sistema que mientres tanto de años dexónos na estacada; esto ye, la llucha revolucionaria contra’l sistema capitalista. Si solo conformamos cola oficialidá, vamos ver que d’equí a unos años la situación nun cambiaría enforma. Entá nun sabemos qué tipu d’oficialidá va ser, pero probablemente, si vien de les manos de Podemos y PSOE, va ser xuna oficialidá más formal que real: vamos vela reflexada nel papel, pero non tantu na nuesa vida cotidiana. Hai quien quieren revalorizar la llingua nel mercáu, que tenga tanta salida como l’inglés o’l chinu. Nós bonalmente vemos más utópica esta pretensión que la llucha pola revolución. La nuesa llingua ye xuna llingua propia del pueblu trabayador, ayena a la cultura burguesa que tou lo mercantiliza, y esto ye daqué que celebramos con arguyu, ye de les poques coses que nun queremos que cambien.

Defendamos la llingua y glayemos pola oficialidá, pero ensin ceder nos principios nin vendenos a un sistema que tardó 40 años en reconocer lo que ye nuesu.

¡Prúyemos un pueblu llibre y revolucionario!
¡Embaxo’l capitalismu!
¡Güei como ayeri, UHP!